fyrstu skrifin

Jæja þá erum við búnar að gera bloggsíðu, við ætlum að reyna að koma myndunum frá spáni inn á síðuna við fyrsta tækifæri. Þar sem við erum báðar ekkert sérstaklega vel að okkur í tölvumálum þá gæti það tekið tíma.

Ég er nú að vinna í sveitinni á Reykhólum og er með svæsna heimþrá, en það hlýtur að lagast fljótlega. Hér er mjög friðsælt ekki er umferðarhávaðinn að drepa mann hér, heldur vaknar maður bara með jarm í eyrunum. Sunnudagamaturinn aldrei langt undan, reyndar er jólamaturinn (þ.e. rjúpan) alltaf að þvælast hér fyrir utan hús, og þar sem ekki má skjóta rjúpur í bænum ,þá var ég að hugsa hvort ég gæti sótt um vistunarmat fyrir þær og tekið þær í háf inn á hjúkrunarheimilið. Það myndi spara mér smápening í desember. 

 Fór í sund í gærkveldi og sundlaugin hér er mjög fín, ekki spillti fyrir ánægjunni að horfa síðan á norðurljósin á leiðinni heim.

kveðja í bili Laufey

Athugasemdir

[Laufey , 3.10.2006 kl. 20:26]

Hér er hinn helmingur að blogga frá höfuðborginni og að stíga sín fyrstu skref í bloggi. Engar rjúpur eru hér á flakki heldur barasta grár og kaldur þriðjudagur. Allavega miðað við hvar tvíeykið laufeyogsteina hafa verið síðastliðnar vikur. Vorum eins og drottningar í 30 stiga hita á Spánarströndum. Reyndar er einn og einn köttur hér að þvælast sem hægt væri að kippa inn fyrir dyrnar í staðinn fyrir rjúpurnar. Það er verið að vinna í myndamálunum og borgarbarnið Steina ætlar að lesa sig sveitta um málið í kvöld og jafnvel gæti orðið fæðing úr þessu. En útvíkkun er ennþá 14 svo langt er í þetta.

Þetta kemur.

Kveðja

Steina